Concello e Subdelegación do Goberno ratifican a incorporación da Policía Local de Santiago ao sistema Vioxen de loita contra a violencia machista

Concello e Subdelegación do Goberno ratifican a incorporación da Policía Local de Santiago ao sistema Vioxen de loita contra a violencia machista

29/06/2020

A Xunta Local de Seguridade aproba o protocolo de convenio que asinará o Concello co Ministerio do Interior para facer efectiva a súa integración no operativo Vioxen

Os índices delituosos no concello diminuíron nestos primeiros seis meses do ano nun 35 por cento como consecuencia do período de confinamento


O Concello de Santiago e a Subdelegación do Goberno da Coruña ratificaron a incorporación da Policía Local deste municipio ao sistema Vioxen de loita contra a violencia de xénero, segundo acordou a Xunta Local de Seguridade reunida baixo a presidencia do alcalde Xosé Sánchez Bugallo e a subdelegada do Goberno na Coruña, Pilar López-Rioboo.

A Xunta Local de Seguridade aprobou o protocolo de convenio que posteriormente será asinado polo Concello co Ministerio de Interior para regular a presencia da Policía Local no sistema Vioxen. Este protocolo, asinado inicialmente polo alcalde e a subdelegada, será remitido ao Ministerio para a súa validación e posterior sinatura por parte do Director Xeral do Ministerio de Interior e facer efectiva desta maneira a participación da cidade de Santiago de Compostela neste operativo.

O sistema Viogen permitirá á Policía Local dispoñer de máis información sobre todos os casos activos de violencia machista, de tal maneira que os propios policías locais pasan a asumir o seguimento e control dalgúns destes casos, xeralmente daqueles que sexan considerados de nivel de risco baixo, mentres que a Policía Nacional encárgase do seguimento dos casos máis graves.

Este protocolo establécese trala creación da Mesa Local de Coordinación Policial na que están presentes a Policía Local e a Policía Nacional, ademáis da Policía Nacional Adscrita, e que ten como finalidade principal aunar esforzos na loita contra a violencia machista.

Pilar López-Rioboo trasladou ao alcalde o seu agradecemento polo esforzo realizado no desenvolvemento das políticas de igualdade e de loita contra a violencia de xénero, tal como se evidencia nas medidas adoptadas e que culminarán coa incorporación da Policía Local ao sistema Vioxen.

Por iso, destacou a lealtade institucional, receptividade e colaboración do Concello e do seu alcalde nesta loita, que permitirá incrementar a coordinación e a propia loita contra a violencia machista xa que “posibilitará conseguir un mellor aproveitamento de tódolos recursos dispoñibles para previr este tipo de violencia a nivel local”.

A subdelegada tivo tamén un agradecemento especial para os concelleiros responsables das áreas de Seguridade Cidadá e de Igualdade e para o anterior goberno municipal, que foi quen principiou o proceso que remata coa incorporación do Concello de Santiago no sistema Vioxen

Por outra parte, os representantes das Forzas de Seguridade do Estado informaron da evolución estatística relativa á seguridade cidadá no municipio. Dadas as circunstancias especiais derivadas da crise sanitaria do COVID-19, nos primeiros seis meses deste ano houbo unha reducción do 35% nos delictos, se ben esta porcentaxe só pode ser considerada dentro do excepcional estado de confinamento existente nos meses de marzo, abril e maio nas súas distintas fases do estado de alarma.

A subdelegada do Goberno trasladou aos representantes das forzas e corpos de seguridade presentes na reunión o seu agradecemento polo traballo e polo esforzo desenvolvido nestes meses, incidindo na importancia de manter a excelente coordinación existente entre todas as forzas..